Thursday, 7 August 2014

ရှစ်လေးလုံး အရေးအခင်း ခေါင်းဖြတ်ပြီး အရပ်တကာလှည့်ခဲ့ခြင်း (၂)

(ရှစ်လေးလုံးမှာ ရက်ရက်စက်စက် သတ်ဖြတ်ခဲ့ကြသည်သာမက ခေါင်းဖြတ်ပြီး လှံသွားချွန်ဖြင့် အောက်လည်ပင်းမှ ထိုးစိုက်ကာ မြို့တွင်း အရပ်တကာ လှည့်လည် ပြသခဲ့ပါသည်။ ရှစ်လေးလုံးမှာ ဘာတွေ ဖြစ်ခဲ့သလဲ သမိုင်းအမှန်ကို လူငယ်တွေသိစေဖို့)

Wednesday, August 6, 2014

သလ္လာဝတီမြို့တော်က အကျည်းတန်သော ဖြစ်ရပ်တစ်ခု
သလ္လာဝတီမြို့ခေါ် မုံရွာမြို့က ကျွန်တော်ရဲ့ ဇာတိချက်ကြွေ၊ မွေးရပ်မြေ။ ကျွန်တော်တို့ မြို့က အခြားမြို့များနှင့်မတူ အတော်ထူးသည်။ “ ထူးရင်ထူး၊ မထူးရင်ရူး” ဆိုသလို ထူးလို့များ ရူးနေလားမသိ။ ပြီးခဲ့တဲ့ အရေးအခင်းကာလတွင်းက မဖြစ်သင့် မဖြစ်ထိုက်သည့် ကိစ္စများ ဖြစ်ပွားခဲ့သည်။

ခေါင်းပြတ်ကြီးနဲ့ အရပ်ကိုလည်
အဆိုးဆုံးဖြစ်ရပ်တစ်ခုကတော့ လူ ၃ ဦးကို ခေါင်းဖြတ်သတ်ဖြတ်ပြီး လှံသွားချွန်ဖြင့် အောက်လည်ပင်းမှ ထိုးစိုက်ကာ မြို့တွင်း အရပ်တကာ လှည့်လည် ပြသခြင်းဖြစ်သည်။ မြို့သူမြို့သား မြင်ရသူအားလုံး အထိတ်တလန့် ဖြစ်ကြရသည်။ တစ်မြို့လုံး ခြောက်ခြား သွားခဲ့ကြရသည်ဟုလည်း သိရသည်။

ဇာတ်တူသားစားကြခြင်း
ခေါင်းဖြတ်သတ်ခံရသူ ၃ ဦးက ဆန္ဒပြသူများကို ဆန့်ကျင်ကြသူများ မဟုတ်ကြ။ အစိုးရကို ထောက်ခံကြသူများလည်း မဟုတ်ကြ။ ဆန္ဒပြသူ အချင်းချင်းသာ ဖြစ်သည်။ လောဘ၊ ဒေါသ၊ မောဟမီးတွေ တစ်ဟုန်းဟုန်း တောက်လာခြင်းကြောင့် အချင်းချင်းကိုပင် မရှောင် တိုက်ခိုက်ကြသည်။ သတ်ဖြတ်ကြသည်။ ဇာတ်တူသားချင်း စားကြသည်ဟု ပြောနိုင်ပါသည်။

မုံရွာမြို့၏ ဆန္ဒပြအဖွဲ့များ
ကျွန်တော်တို့ မုံရွာမြို့တွင် ဆန္ဒပြအဖွဲ့ ၂ ဖွဲ့ရှိသည်။ “ပြည်သူ့သမဂ္ဂ” အဖွဲ့ကို ဘုန်းတော်ကြီး ဦးသုမနက ခေါင်းဆောင်သည်။ မုံရွာမြို့ “ ဆုတောင်းပြည့်” ဘုရားကြီးဝင်း အတွင်းတွင် သပိတ်စခန်းဖွင့်ထားသည်။ အခြားတစ်ဖွဲ့ကတော့ “ ပြည့်သူ့သံဃာ” အဖွဲ့ ဖြစ်ပြီး ကိုသိန်းတန်ဆိုသူက ခေါင်းဆောင်၊ ဝင်းမြင့်က ဒုတိယ ခေါင်းဆောင်ဖြစ်သည်။ ယင်းအဖွဲ့က အုန်းခြံရပ်၊ အမှတ် (၂) အစိုးရ အလယ်တန်းကျောင်းဝင်း အတွင်းတွင် အခြေ ပြုသည်။

တစ်ဂူကို နှစ်ကောင်အောင်းလိုမှု
အထက်ပါ ပြည်သူ့သမဂ္ဂနှင့် ပြည့်သူ့သံဃာသပိတ်အဖွဲ့နှစ်ဖွဲ့က အစပိုင်းတွင် ညီညီ ညွတ်ညွတ်ဖြင့် ပူးတွဲ ဆန္ဒပြခဲ့ကြသည်။ ပူးတွဲလုပ်ဆောင်ခဲ့ကြသည်။ မြို့မိမြိုဖများ၊ မြို့သူ မြို့သားများ၊ ကျောင်းသားကျောင်းသူများ၊ ရဟန်းသံဃာတော်များပါ ပါဝင်ကြရာ အင်အား ၄၀၀၀ ကျော်ခန့်လောက် ရှိသည်ဟု သိရသည်။ ပြည်သူလူထု၏ အကူအညီ အထောက်အပံ့များလည်း အတော်များများ ရရှိခဲ့သဖြင့် ရန်ပုံငွေများ၊ ဆန်၊ ဆီ၊ ဆား စသည့် ရိက္ခာပစ္စည်းများလည်း အလွန်ပြည့်စုံသည်ဟု ဆိုသည်။ မြို့အုပ်ချုပ်ရေးကိုလည်း အလျဉ်းသင့်သလို ခွဲဝေတာဝန်ယူလျက်ရှိရာ အချိန်ကြာလာသည်နှင့်အမျှ ထိပ်တိုက် တိုးခြင်းများ၊ အချင်းချင်း မသင့်မြတ်မှုများ ဖြစ်ပေါ်လာခဲ့သည်။ ရရှိထားသော အလှူငွေများ၊ ရိက္ခာပစ္စည်းများ ခွဲဝေရာတွင်လည်း သဘောထားကွဲလွဲမှုများကြောင့် တစ်နေ့တစ်ခြား မသင့်မြတ်မှုများ၊ အဆင်မပြေမှုများ တိုးပွားလာပြီး တစ်ဖွဲ့နှင့်တစ်ဖွဲ့ ပူးပေါင်းလို့ မရတော့ဘဲ ရန်သူများအသွင် ကူးပြောင်းသွားတော့သည်။ အစည်းအဝေး တစ်ခုတွင် ထိုးကြ၊ ကြိတ်ကြ၊ နပန်းလုံးကြသည်အထိ ဖြစ်ပေါ်ခဲ့ရပြီး ကြည့်မကောင်း၊ ရှုမကောင်း၊ အစည်းအဝေးတက်ရောက်သူများ အတော်စိတ်ပျက်ခဲ့ကြရသည်။ ထိုနေ့မှ စ၍ တစ်ဖွဲ့နှင့်တစ်ဖွဲ့ လမ်းမှာတွေ့လျှင် ဦးသူက လောက်လေးခွ၊ ဂျင်ကလိတို့နှင့် ပစ်ခတ် ကြသည်ဟု သိရသည်။

ကျောင်းသား ၃ ဦး အဖမ်းခံရခြင်း
တစ်နေ့တွင် “ပြည်သူ့သမဂ္ဂ”မှ ကျောင်းသား ၃ ဦး “ ပြည့်သူ့သံဃာ” သပိတ်စခန်းသို့ ရုပ်ဖျက်ပြီး သွားရောက်ချောင်းမြောင်း ထောက်လှမ်းစဉ် ဖမ်းဆီးခြင်း ခံရသည်။ ယင်း ကျောင်းသား ၃ ဦးအား ခေါင်းဖြတ်သတ်မည်ဖြစ်ပြီး မြို့မိမြို့ဖများ လာရောက် ကြည့်ရှုရန် “ ပြည့်သူ့သံဃာ” အဖွဲ့က ဆင့်ခေါ်သည်။ ခေါင်းဖြတ်မည့် အစီအစဉ်ကလည်း အခြား နေရာတွေမှာလို ဓားနှင့် ခုတ်ဖြတ်ခြင်း မဟုတ်။ သစ်စက်လွှစင်တွင် တင်ပြီး သစ်ခွဲသလို လွှဖြင့် လည်ပင်းမှ ဖြတ်ရန်ဖြစ်သည်။ ထိုနေ့က မီးမလာသဖြင့် လွှဝိုင်းကို လက်ဖြင့်လှည့်ပြီး ဖြတ်ရန်စီစဉ်နေသည်ကို မြို့မိမြို့ဖ ၆ ဦးခန့်က ကျောင်းသားလေးတွေကို မသတ်ဖို့၊ ပြန်လွှတ်ပေးဖို့၊ ဝိုင်းဝန်းတောင်းပန်သဖြင့် မသတ်ဖြတ်ဘဲ လွှတ်ပေးခဲ့ကြသည်။

တရုတ်ဇာတ်ကား အားကျသလားမသိ
ထိုသို့ ကျောင်းသားလေးများကို ဖမ်းဆီးပြီး ခေါင်းဖြတ်သတ်ရန် စီစဉ်ခဲ့သော “ပြည့်သူ့သံဃာ” သပိတ်အဖွဲ့၏ လုပ်ဆောင်ချက်ကို “ပြည်သူ့သမဂ္ဂ” သပိတ်အဖွဲ့က လုံးဝမကျေနပ်။ အာဏာခွဲဝေမှုတွင်လည်းကောင်း၊ ရရှိသော ငွေ၊ ရိက္ခာ၊ ပစ္စည်းများ ခွဲဝေရာတွင်လည်းကောင်း မသင့်မြတ်မှုများ ရှိနေပြီးဖြစ်၍ “ ပြည့်သူ့သံဃာ” အဖွဲ့ကို တိုက်ခိုက်ချေမှုန်းရန် စီစဉ်ခဲ့ကြတော့သည်။ လက်စားချေဖို့ လုပ်ကြတော့သည်။

မြို့လယ်က တိုက်ပွဲ
အခွင့်ကောင်းစောင့်နေသော “ပြည်သူ့သမဂ္ဂ”အဖွဲ့က အမှတ် (၂) အစိုးရ အလယ်တန်း ကျောင်းဝင်း အတွင်းရှိ သိန်းတန်နှင့် ဝင်းမြင့်တို့ ခေါင်းဆောင်သော “ပြည့်သူ့သံဃာ” အဖွဲ့ကို အလစ်အငိုက် ဝင်ရောက်တိုက်ခိုက်ကြတော့သည်။ မုံရွာမြို့တွင် စစ်မြေပြင်က တိုက်ပွဲလေး တစ်ခုသဖွယ် သေနတ်သံများက ဆူညံသွားတော့သည်။ နှစ်ဖက်လုံး သေနတ်သုံးကြသည်။ ရဲစခန်းများမှ ကြိုတင်သိမ်းဆည်းထားခဲ့ကြသော သေနတ်များနှင့် လိုင်စင်ဖြင့် ကိုင်ဆောင်ကြသော သေနတ်များဖြင့် ပစ်ခတ်ကြခြင်း ဖြစ်သည်။ သေနတ်များက မျိုးစုံသည်။ ရိုင်ဖယ်လည်း ပါသည်။ စတင်းသေနတ်လည်း ပါသည်။ နှစ်လုံးပြူး သေနတ် (DB) လည်းပါသည်။ အသေအပျောက်ရှိသည်ဟုတော့ မကြားရ။ ဒဏ်ရာရကြသူတွေတော့ အတော်များသည်ဟုဆိုသည်။ အော်သူအော်၊ သွေးအလိမ်းလိမ်းနှင့် ပြေးသူပြေး ငိုသူ ငို၊ ကျွန်တော်တို့ မြို့တွင် ကမ္ဘာပျက်သလို ဖြစ်ခဲ့ရသည်။ အချင်းချင်း ကလဲ့စား ချေလိုစိတ်၊ မကျေနပ်ချက်များနှင့် အာဃာတများ ကြောင့်လား သို့မဟုတ် မကောင်းဆိုးဝါးများက အတင်းတိုက်တွန်း နေလို့လားမသိ၊ ကိုယ့်တစ်မြို့တည်းသားချင်း၊ ဇာတ်တူသားချင်း တိုက်ခိုက်မှုများကြောင့် ကျွန်တော်တို့မြို့ သွေးမြေကျခဲ့ကြရသည်။

ဦးသုမန၊ ပြည်သူ့သမဂ္ဂ အနိုင်ရ
“ပြည်သူ့သမဂ္ဂ” သပိတ်အဖွဲ့က လူအင်အားလည်း များသည်။ တိုက်ပွဲအတွက် စနစ်တကျ ကြိုတင်ပြင်ဆင်ပြီးမှ အလစ်အငိုက် ဝင်ရောက်တိုက်ခိုက်ခဲ့ခြင်းလည်း ဖြစ်တော့ “ ပြည့်သူ့သံဃာ” အဖွဲ့ ရှုံးသွားသည်။ ခေါင်းဆောင်သိန်းတန်၊ ဝင်းမြင့်နှင့် အခြားတစ်ဦး (အမည်မမှတ်မိတော့) ဖမ်းဆီးခံရသည်။

ပြောမယုံ ကမ်းကုန်အောင် ရက်စက်လိုက်ပုံက
ဖမ်းဆီးရမိသူ သိန်းတန်၊ ဝင်းမြင့်နှင့် အခြားသပိတ်အဖွဲ့ဝင်တစ်ဦး ပေါင်း ၃ ဦးတို့ကို ကြိုးတုပ်ပြီး “ပြည်သူ့သမဂ္ဂ” အခြေစိုက်ရာ ဆုတောင်းပြည့်ဘုရားကြီး အတွင်းသို့ ခေါ်သွားကြသည်။ ဘယ်အငြိုးနဲ့များ ငြိုးလေသည်မသိ။ ရောက်ရောက်ချင်း သံချွန်တွေနှင့် တစ်ကိုယ်လုံး ထိုးကြသည်။ အစာမကျွေး၊ ရေမတိုက်၊ အငတ်ထားသည်။ အသားတွေ ပါးပါးလှီး၊ လူမဆန်သောနည်းများဖြင့် နှိပ်စက်ကြသည်။ နောက်ဆုံး ရေနှစ်၊ ခေါင်းဖြတ် သတ်လိုက်ကြသည်ဟု သိရသည်။ သွေးဆူနေသော ကျောင်းသားလေးများက သိန်းတန် တို့၏ ခေါင်းပြတ်ကြီး ၃ လုံးကို လှံချွန်နှင့် လည်ပင်းမှ ထိုးစိုက်ပြီး တစ်မြို့လုံး လျှောက်ပြ ကြသည်။

ဒီလို အဖြစ်များ မကြားလိုပါ
ကျွန်တော် ခေါင်းဖြတ် အသတ်ခံရသူများကို မသိပါ။ ခေါင်းဖြတ်သူများ၏ ခေါင်းဆောင် ဦးသုမနကိုလည်း မသိပါ။ မြို့မိမြို့ဖ လူကြီးအချို့ကိုတော့ သိပါသည်။ ကျောင်းသား ၃ ဦး၏ အသက်ကို ကယ်တင်ခဲ့ကြသူများကို အထူးကျေးဇူး တင်ရပါသည်။ ဤကဲ့သို့ ဇာတ်တူသားစားခြင်း၊ အငြိုးဖြင့် ကလဲ့စားချေခြင်း၊ ရက်ရက်စက်စက် ညှင်းပန်း နှိပ်စက်ပြီးမှ လူမဆန်စွာ သတ်ဖြတ်ခြင်းမျိုးလည်း ထပ်မံမဖြစ်စေလိုပါ။ အထူးသဖြင့် တစ်မြို့လုံး တုန်လှုပ်ခြောက်ခြားသွားစေသည့် ခေါင်းပြတ်များကို လှည့်လည် ပြသခြင်း၊ ကျောင်းသားအရွယ် လူမမယ်လေးများ သွေးစွန်းသွားစေခြင်းမျိုးလည်း မလိုလားပါ။ ဘဝဆက်တိုင်း မမြင်ရ၊ မကြားရ၊ မတွေ့ရတဲ့ကိုယ် ဖြစ်ရပါလို၏လို့ပဲ ဆုတောင်း လိုက်ရ ပါတော့သည်။

(အငြိမ်းစားဒုတိယဗိုလ်ချုပ်ကြီးထွန်းကြည်၏ မှတ်တမ်း)(ဆက်ပါဦးမည်)

From:ပြည်သူ့အာဏာ

www.mmdailystar.com

0 comments:

Post a Comment

လွတ်လပ်စွာပြောဆို ရေးသားနိုင်ပါသည်။
မှတ်ချက်များကို မကြာမှီ ဖော်ပြပေးပါမည်။

Related Posts Plugin for WordPress, Blogger...