Sunday, 14 September 2014

နေမျိုးဇင်သို့ သတိပေးဆုံးမခြင်း


တစ်နေ့က လူမှုကွန်ယက်ပေါ်နှင့် မီဒီယာစာမျက်နှာအချို့မှာ ဝေဖန်မှုများ နေသော သတင်းတစ်ပုဒ်အား ဖတ်လိုက်ရလေသည်။ ဗိုလ်ကြီးဟောင်းဟု သူ့ကိုယ်သူယနေ့ထက်တိုင်သမုတ်နေသော နေမျိုးဇင်ဆိုသူက စစ်တက္ကသိုလ်မှ ကျောင်းဆရာ/မ များသည် စာသင်ခန်းအတွင်း ရေခဲထုပ်ရောင်းပြီး ဗိုလ်လောင်းများကို စာသင် သည်ဟုဖော်ပြထားခြင်းပင်ဖြစ်ပေသည်။ နေမျိုးဇင်အနေနှင့် ဆရာ/ဆရာမများအားလုံး စစ်တက္ကသိုလ် ဗိုလ်လောင်း အားလုံးနှင့် စစ်တက္ကသိုလ်ကြီးတစ်ခုလုံးကိုပါ အပုတ်ချလိုက်ခြင်းဖြစ်သည့်အပြင် မိမိကောင်းကျိုး လိုရာအတွက် မိမိကိုသင်ကြားပေးခဲ့သော အနန္တဂိုဏ်းဝင် ဆရာ/ဆရာမများကိုပါ ယုတ်မာစွာစော်ကား လိုက် လေခြင်းဖြစ်ပေတော့သည်။

စာရေးသူသည် စစ်တက္ကသိုလ်ကျောင်းဆင်းတစ်ဦးဖြစ်ပြီး တပ်မတော်မှ သက်ပြည့်ပင်စင်ဖြင့် အငြိမ်းစားယူထား သည်မှာ (၈) နှစ်ပင်ပြည့်ခဲ့ပြီဖြစ်သည်။ စစ်မှုထမ်းဟောင်းဘ၀ဖြင့် အေးဆေးတည်ငြိမ်သော ဘ၀ကိုဖြတ်သန်း နေသူလဲဖြစ်ပေသည်။ သို့သော် နေမျိုးဇင်ကဲ့သို့ သစ္စာဖောက်တစ်ဦးမှ ယခုလို စစ်တက္ကသိုလ်နှင့်စစ်တက္ကသိုလ်မှ ဆရာ/မများ ဗိုလ်လောင်းများ ကျောင်းဆင်း အရာရှိများအားလုံးကို စော်ကားလိုက်ခြင်း ကိုတော့ လက်ပိုက်ကြည့်နေနိုင် မည်မဟုတ်ပေ။ နေမျိုးဇင်ဆိုသူသည် စစ်တက္ကသိုလ် အမှတ်စဉ်(၃၉) မှကျောင်းဆင်း အရာရှိတစ်ဦးဖြစ်ပြီး တပ်မတော်မှရှုံ့ချ၍ ထုတ်ပစ်ခြင်းခံထားရ သူ တစ်ဦးလဲဖြစ် ပေသည်။ သူသည် အငြိမ်းစားမဟုတ်ပါ တပ်မတော်မှ ထုတ်ပယ်လိုက်သော ဗိုလ်ပြုတ်တစ်ယောက်သာ ဖြစ်ပေသည်။ ယခုအခါတွင် နာမည်ကြီးစေရန်အတွက် ပေါ်ပင်နိုင်ငံရေးများပြုလုပ်ခြင်း၊ အဖွဲ့စည်းများ ထောင်ခြင်း၊ တပ်မတော် အားအပုတ်ချခြင်းများကိုသာ လုပ်ကိုင်နေသူဖြစ် ပေသည်။ ယခုကဲ့သို့ ပရဟိတ အဖွဲ့ဖွဲ့စည်းခြင်း ကိုအကြောင်းပြု ကာ မိမိနာမည်ကြီးစေရန်အတွက် အနန္တဂိုဏ်းဝင် ဆရာ/မများကိုပါ စော်ကားလိုက်   ခြင်းကတော့ များစွာ ယုတ်မာသောလုပ်ရပ်ဖြစ်ပေသည်။

နေမျိုးဇင်လို လူတစ်ယောက်၏စကားကြောင့် စစ်တက္ကသိုလ်ကို အားလုံးအထင် မှားပေတော့မည်။ အမှန်မှာ သူပြောသကဲ့သို့တစ်ခုမှ မဟုတ်ချေ။ စစ်တက္ကသိုလ်အနေဖြင့် အရပ်ဘက် ဆရာ/မများကိုလေးစားစွာ ဆက်ဆံ သည်မှာ ဆရာ/မများအားလုံးအသိပင်ဖြစ်ပေသည်။ ဆရာ/မ များရောက်ရှိကာစကပင် နေစရာ အိမ်၊ သွားစရာ ကြို/ပို့ယာဉ်ကအစပြု၍ သက်သာချောင်ချိရေးမျိုးစုံကို ပြုလုပ်ပေးသည်မှာ အမှန်တရားပင်ဖြစ်ပေသည်။ အထိမ်းမှတ်နေ့များတွင် လည်း ဆရာ/မများအတွက် အမှတ်တရလက်ဆောင်များ ပေးအပ်ခြင်း၊ ၀တ်စုံများ ထောက်ပံ့ပေးခြင်းတို့ ကို နှစ်စဉ်ပြုလုပ်လျက်ရှိပေသည်။ ဆရာ/မများ ၏ သက်သာချောင်ချိ ရေးတွင်လည်း လိုအပ်သည့် အခက်ခဲမှန်သမျှကို လိုက်လံဖြေရှင်းပေးလျှက်ရှိသည့်အပြင် ဆရာ/မများ၏ မှီခိုသူကလေး များအတွက်ပင် ကျောင်းစားရိတ်နှင့် အခြားထောက်ပံ့မှုမျိုးစုံကို ပြုလုပ်ပေးသည် မှာ အားလုံးအသိပင် ဖြစ်ပေ သည်။ စာရေးသူတို့ဗိုလ်လောင်းဘ၀တွင်လည်း ဆရာ/မများမှာ ဗိုလ်လောင်းများ အားရေခဲထုပ် ရောင်းဖို့ မပြောနှင့် သူတို့ရှိသည့်မုန့်များကိုပါ ကျွေးမွေးခဲ့ကာ ဆရာတပည့် မေတ္တာတည်ခဲ့ကြသည်။ နောက်ထပ် စစ်တက္ကသိုလ်၏ ပုံရိပ်ကျန်သေးသည် ထိုအရာကား ဆရာ/ဆရာမ များအား အလေးပြုခြင်းပင်ဖြစ်ပေသည်။ စာရေးသူသည်လည်းယနေ့ထက်တိုင် သင်ကြားခဲ့သော ဆရာ/မများ သက်ရှိထင်ရှားရှိ နေသေးလျှင် အလေးပြု အုံးမည်ဖြစ်ပေသည်။ ဤအရာမှာ စစ်တက္ကသိုလ်အတွက် အင်မတန် လှပသော မေတ္တာတရားပင်ဖြစ်ပေသည်။

ထိုမျှရှားပါးလှသော ဆရာ/တပည့်ကြားကသံယောစဉ် မေတ္တာတရားကို နေမျိုးဇင်အနေဖြင့် မည်ကဲ့သို့သော စိတ်ကူးမျိုးဖြင့် စော်ကားခဲ့သည်ကို စဉ်းစား၍မရနိုင်ချေ။ ပရဟိတကိုအကြောင်းပြု၍ ကိုယ်ကျိုးရှာနေသော နေမျိုးဇင်အဖို့ သူနာမည်ကြီးရန်အတွက် ယခုလိုပြောဆိုခြင်းဟာ အင်မတန်မှ စက်ဆုပ်ဖွယ်ကောင်းလှပေသည်။ ထို့အတူ စစ်တက္ကသိုလ်နှင့် စစ်တက္ကသိုလ်မှ ဆရာ/မများအားလည်း သွေးထိုးစော်ကားခြင်းဖြစ်ပေသည်။ မိမိ နာမည်ကြီးရန် အတွက်ယခုလို စစ်တက္ကသိုလ်နှင့် အနန္တဂိုဏ်းဝင်ဆရာ/မများအား စော်ကား မော်ကား ပြောဆို လိုက်သော နေမျိုးဇင်အား စစ်တက္ကသိုလ်ကျောင်းဆင်း များအားလုံးကိုယ်စား စစ်တက္ကသိုလ် ကျောင်းဆင်း အငြိမ်းစားတစ်ဦးမှ သတိပေးဆုံးမလိုက်ရပါတော့သည်။ 




From: စစ်တက္ကသိုလ်ကျောင်းဆင်းအငြိမ်းစားတစ်ဦး

www.mmdailystar.com

0 comments:

Post a Comment

လွတ်လပ်စွာပြောဆို ရေးသားနိုင်ပါသည်။
မှတ်ချက်များကို မကြာမှီ ဖော်ပြပေးပါမည်။

Related Posts Plugin for WordPress, Blogger...