Friday, 10 October 2014

Eleven သည် စတုထ္ထမဏ္ဍိုင်ကို ညစ်နွမ်းစေခဲ့ပြီ






စာရေးသူတို့ မြန်မာနိုင်ငံတွင် စတုထ္ထမဏ္ဍိုင်အားကောင်းလာသည်နှင့်အမျှ မီဒီယာကြီးများ သြဇာရှိလာသည်မှာကောင်း သည့်အလားအလာပင်ဖြစ်ပေသည်။ သို့သော်ငြားလည်း မီဒီယာကြီးများအနေဖြင့် စတုထ္ထမဏ္ဍိုင်တစ်ခုလုံးကိုလွှမ်းမိုး ချုပ်ကိုင်လိုစိတ်များရှိလာခြင်း ကတော့စိုးရိမ်ပူပန်ရမည်ဖြစ်ပေသည်။ ယခုဆိုလျှင် မြန်မာနိုင်ငံ၏ ပထမမီဒီယာဟုခေါ်ဆို နိုင်သော Eleven မီဒီယာနှင့် ပြန်ကြားရေးဝန်ကြီးတို့အချေအတင် စကားများကာ တရားစွဲဆိုမည့်ကိစ္စများဖြစ်ပေါ်နေပေ သည်။

သို့သော် ၀န်ကြီးတရားစွဲဆိုမည့် မီဒီယာကတော့ Eleven မီဒီယာတစ်ခုတည်းမဟုတ်ပေ မြန်မာသံတော်ဆင့် ဂျာနယ်လည်းပါပေသည်။ လူမှုကွန်ယက်များနှင့် မီဒီယာစာမျက်နှာများတွင်တော့ Eleven နှင့်သာ အပြန်အလှန်စကား စစ်ထိုးမှုများ ဖြစ်ပေါ်လျက်ရှိပေသည်။

ဝန်ကြီးပြောဆိုသည်ကရှင်းပေသည် သူ၏ပိုင်ဆိုင်မှုများကို စုံစမ်းစစ်ဆေး၍ အထောက် အထားခိုင်လုံက ဥပဒေအရသူ့အား အရေးယူနိုင်သည်ဟုဆိုထားပေသည်။ မီဒီယာများမှ ယခုလိုအထောက် အထားမခိုင်လုံပဲ ပြောဆိုခြင်းအပေါ်တွင်တရားစွဲဆိုသွားမည်ဖြစ်ကြောင်းပြောဆိုခဲ့ပေသည်။

မြန်မာသံတော်ဆင့်ကတော့ ဥပဒေအရသာရင်ဆိုင်သွားရန်ပြင်ဆင်ပါမည်ဟုပြောဆိုခြင်းမှတပါး အခြားမည်သည့်စကား သံမျှထွက်မလာခဲ့ပေ။ သို့သော် Eleven ကတော့ သူတို့၏အစဉ်အလာအတိုင်း ကတ်ကတ်လန်ရန်တွေ့ပွဲများဖန်တီးပေတော့သည်။

Eleven ၏ပြန်လည် ရှင်းလင်းချက်များတွင် ဒေါက်တာဆိတ်ဖွားလည်းပါလာသည်၊ လွှတ်တော်လည်းပါလာသည်၊ ၀န်ကြီးဌာနထက် အစိုးရဟု ပါသုံးနှုံးလာခဲ့ပေသည်။ ဆိုင်သည်မဆိုင်သည်မသိ မြိုင်ဖို့ကအရေးကြီးဟုထင်ထားပုံရပေသည်။ ယခုအခါ မီဒီယာ လောက နှင့် လူမှုကွန်ယက်များအထက်တွင်တော့ အစိုးရ၀န်ကြီးတစ်ဦးနှင့် Eleven မီဒီယာတို့၏စစ်ပွဲမှာ မြင်မကောင်းအောင် ဖြစ်နေခဲ့တော့ပေသည်။

တဆက်တည်းထွက်ပေါ်လာသည့်သတင်းကတော့ ပို၍စိတ်ဝင်စားစရာကောင်းပေသည်။ ထူးဖောင်ဒေးရှင်းမှ Eleven မီဒီ ယာအားတရားစွဲမည့်ကိစ္စပင် ဖြစ်ပေတော့သည်။ ခါကာဘိုရာဇီ တောင်သို့တက်ရောက်ရာမှ ပျောက်ဆုံးနေသော တောင်တက် သမားနှစ်ဦးကို ရှာဖွေရန် တရုတ်နိုင်ငံမှကူညီသော တောင်တက်အဖွဲ့အား အဆင့်တန်းမမီသဖြင့် ပြန်လည် စေလွှတ်လိုက်သည်ဟု Eleven မီဒီယာမှ ဖော်ပြထားခြင်းဖြစ်ပေသည်။

သတင်းအမှန်မှာတော့ ခါကာဘိုရာဇီ တောင်အား မြန်မာပြည်ဘက်မှ တက်သည်ထက် တိဘက်တောင်ကြောမှတက်လျှင်ပို၍နီးနိုင်သည်ဟုဆိုကာ တရုတ်တောင်တက် အဖွဲ့သည် ထွက်ခွာခဲ့ခြင်းဖြစ်ကြောင်း ထူးဖောင်ဒေးရှင်းမှပြန်လည်ဖြေရှင်းထားပေသည်။ သို့ရာတွင် Eleven မီဒီယာ အနေဖြင့် ယခုလိုသတင်းစဉ်ကို တိတိကျကျမသိပါပဲ အထောက်အထားမခိုင်လုံပါပဲ ဖော်ပြခြင်းမှာ နှစ်နိုင်ငံချစ်ကြည်ရေး ကိုပျက်ပြားစေခြင်း၊ အဖွဲ့အစည်း၏ဂုဏ်သိက္ခာပါထိခိုက်စေခြင်းနှင့် မီဒီယာကျင့်ဝတ်ချိုးဖောက်ခြင်းတို့ကြောင့် တရားစွဲဆို သွားမည်ဖြစ်ကြောင်း ပြောကြားခဲ့ပေသည်။ မြန်မာနိုင်ငံ၏ မီဒီယာကြီးတစ်ခုဟာ ယခုလိုကျင့်ဝတ်စည်းကမ်းများ ချိုးဖောက် ၍ ကိုထင်ရာရေးနေခြင်းမှာ နိုင်ငံအတွက်များစွာနစ်နာပေသည်။

ယခုလိုထူးဖောင်ဒေးရှင်းမှ တရားစွဲဆိုမည့် အပေါ်တွင် Eleven မှမည်ကဲ့သို့တစ်ခွန်းမကျန်ပြည်လည်ဖြေရှင်းရန်တွေ့မည်ဆိုသည်ကတော့ စာမျက်နှာများထက်တွင် ဆက်လက် စောင့် ကြည့်ရမည် ဖြစ်သည်။
မီဒီယာများအပေါ်တွင် တရားစွဲဆိုမှုများဖြစ်ပေါ်လာခြင်းသည် မီဒီယာလွတ်လပ်ခွင့်ကို များစွာထိပါးကြောင်း Eleven မှ ဖော်ပြခဲ့ဘူးပေသည်။

၎င်းတို့မီဒီယာအပေါ်တရားစွဲဆိုခဲ့ရပါက ဆတ်ဆတ်ထိမခံပြန်လည်ချေပတတ်သော Eleven ၏ အခြားသောမီဒီယာများကို တရားစွဲဆိုမှုများကတော့ မေးခွန်းထုတ်စရာပင်ဖြစ်ပေသည်။ စာနယ်ဇင်းကောင်စီကို အိပ်ကပ် ထဲထည့်ထားသည်ဟု ရုံးတွင်ပြောကြားဘူးသော သန်းထွဋ်အောင်သည် Eleven နှင့်ထိပ်တိုက်တွေ့သော ပြသနာများတွင် စာနယ်ဇင်းကောင်စီ၏ ကြားဝင်ဖြေရှင်းပေးမှုကို ဘယ်တုန်းကမျှလက်မခံခဲ့ပဲ ၄င်းတို့မှစတင်၍ အကြိမ်ကြိမ် တရားစွဲ ခဲ့သည့်ဖြစ်ရပ်များရှိခဲ့ဘူးသည်။

ရန်ကုန်တိုင်း(မ်) ဂျာနယ်တွင်ဖော်ပြခဲ့သော ၁၁ ဘီလျံရှင်းတမ်း ဆိုသည့်ဆောင်းပါးသည် ၄င်းတို့ဂုဏ်သိက္ခာကိုထိပါးစေသည်ဟုဆိုကာ ဆောင်းပါးရှင် ဦးစည်သူအောင်မြင့်နှင့် ရန်ကုန်တိုင်း(မ်)ဂျာနယ်တို့အပေါ် တရားစွဲဆိုခဲ့သော ကိစ္စသည်မီဒီယာလောကတွင် ဟိုးလေးတစ်ကျော်ကျော်ဖြစ်ခဲ့ဘူးသည်။

ထို့အတူ လွိုင်ကော်မြို့မှEleven သတင်းထောက် နော်ခိုင်ခိုင်အေးချိုအား ပိုင်နက်ကျူးလွန်းမှု၊ အသရေဖျက်မှု၊ ညစ်ညမ်းစကားများ ပြောဆိုမှုတို့ဖြင့် ထောင်ဒဏ် (၅) လချမှတ်ခဲ့ခြင်းကိုလည်း တရားမျှတမှုမရှိ၍ ပြန်လည်တရားစွဲမှုများ ပြုလုပ်သွားမည်ဟု ဦးဝေဖြိုးမှပြောခဲ့ သေးသည်။

ယခုအခါတွင်လည်း ၄င်းတို့မီဒီယာအား ပြန်ကြားရေးဝန်ကြီးမှတရား စွဲဆိုမည့် သတင်းကိုဖော်ပြပေးခဲ့သော 7 Days မီဒီယာအားသတိပေးချက်များ အကြောင်းကြားစာများ ဖြေရှင်းပေးစေလိုမှု ဆိုသည့် စာများထုတ်ထား သည်ကို လည်းတွေ့မြင်ကြရပေမည်ဖြစ်ပေသည်။ မီဒီယာသမား အချင်းချင်းအားနည်းမျိုးစုံဖြင့် တရားစွဲခဲ့သော Eleven သည် ၄င်းတို့မီဒီယာကို တရားစွဲလာလျှင်တော့ အရပ်ကူပါလူဝိုင်းပါဖြင့်မပွပွအောင်ဖွကာ ဆတ်ဆတ်ထိမခံပြန်လည် ခွန်းတုန့်ပြန် တတ်သည်ကတော့ မီဒီယာနှင့်မတူ အာဏာရှင်နှင့်တူသည်လို့သာပြောရမည်ဖြစ် ပေသည်။

ထိုမျှသာမကသေး Eleven မီဒီယာ၏တစ်ဖက်စောင်းနင်း ရေးသားမှုများသည် အွန်လိုင်းလူမှုကွန်ယက်များတွင်ဝေဖန်မှု များစွာကြုံတွေ့နေရသေးသည်။ အစောပိုင်းတွင် မီဒီယာကြီး၏ သတင်းများကြောင့် ပြည်သူအများနှစ်ခြိုက်ကြသော်လည်း KIA နှင့်ပတ်သက်သော စစ်ပွဲများတွင် တစ်ဖက်သက်ဖော်ပြမှုများကြောင့်ပြည်သူ့ချဉ်ဖတ် မီဒီယာကြီးဖြစ်လာ တော့သည်။

ထို့အတူ မီဒီယာလုပ်ငန်းမှ ပုဂ္ဂိုလ်များ၊ ၀န်ကြီးဌာနမှ သက်ဆိုင်ရာ တာဝန်ရှိသူများနှင့် ဥပဒေ ပညာရှင် များမှ မီဒီယာ ဥပဒေကြမ်းလုပ်သည့်အပေါ် Eleven မှ ပြင်းထန်စွာ ကန့်ကွက်ခဲ့သေးသည်။ အစပိုင်းတွင် Eleven မှ ကန့်ကွက်ကြောင်းနှင့် ကျန်သည့် မီဒီယာလုပ်ငန်းများမှ ၀ိုင်းပြီး ကန့်ကွက်ကြရန် ဆော်သြသည်။ အုပ်စုလိုက် အသံရလာ သည့်အခါ စာနယ်ဇင်းကောင်စီနှင့် ပုံနှိပ် မီဒီယာလောက တစ်ခုလုံးမှ ကန့်ကွက်သယောင် အသံထွက်သည်။ နောက်ဆုံး တွင်တော့ မိမိဂျာနယ်တိုက်တွင် ဗီနိုင်း ဆိုင်းဘုတ် ထောင်၍ကန့်ကွက်ခဲ့ပေသည်။

မြန်မာနိုင်ငံတွင် ထိုသို့ ဂျာနယ်တွင် ဖော်ပြချင်ရာဖော်ပြပြီး အစိုးရကို အပုပ်ချခွင့်ရှိနေသည့်နောက် ဘာကြောင့်ဒေါက်တာဆိတ်ဖွားကိုရှာဖို့ စုံစမ်းရေး ကော်မရှင်ဖွဲ့နေသနည်းဟုမေးချင်သည်။ ၀န်ကြီးဌာနမှရေးဆွဲပြီး လွှတ်တော်ကိုယ်စားလှယ်များ ဆွေးနွေးရန် တင်သွင်း သည့် ဥပဒေမူကြမ်းကို လွှတ်တော်ပြင်မှမီဒီယာ ခေါင်းစဉ်တပ်ပြီး စိတ်တိုင်းကျ ပုတ်ခတ်၍ရပါသလား။

မီဒီယာ ဟုဆိုကာ အစိုးရနှင့် အုပ်ချုပ်သူ အားလုံးကို စိတ်တိုင်းကျ အပုပ်ချခွင့်ရနေသည့် ခေတ်ကို ရောက်နေပြီလား၊ မိမိကိုယ်ထိပါး လာလျှင်တော့ဖြင့် နည်းမျိုးစုံဖြင့်ရန်ပြန်တွေ့ကာ ရေးချင်ရာများရေးသည့်မီဒီယာဖြစ်နေပြီလားဟု သုံးသပ် ချင်ပါသည်။
နိုင်ငံတစ်နိုင်ငံတွင် မဏ္ဍိုင်သုံးရပ်၏ အဓိက အထောက်အပံ့ဖြစ်သည့် စတုထ္ထမဏ္ဍိုင်ခေါ် မီဒီယာလောကသည် ထိုနိုင်ငံ၏ အသက်တမျှ အရေးကြီးလှပေသည်။

Eleven မီဒီယာအနေဖြင့် နိုင်ငံ၏ကြော်ကြားထင်ရှားသော မီဒီယာကြီးတစ်ခုဖြစ်ပါ လျက်နှင့်ယခုလို ထင်ရာစိုင်းနေခြင်းမှာ နိုင်ငံနှင့်ပြည်သူလူထုအတွက်များစွာနစ်နာလျက်ရှိပြီး စတုထ္ထမဏ္ဍိုင်အားညစ်နွမ်း စေခဲ့သည်မှာလည်း အမှန်ပင်ဖြစ်ကြောင်းရေးသားဖော်ပြအပ်ပေသည်။

မင်းထက်သာ(ဗဟန်း)
From: Today myanmar

www.mmdailystar.com

0 comments:

Post a Comment

လွတ်လပ်စွာပြောဆို ရေးသားနိုင်ပါသည်။
မှတ်ချက်များကို မကြာမှီ ဖော်ပြပေးပါမည်။

Related Posts Plugin for WordPress, Blogger...